ഞാൻ കൂടെയുള്ളപ്പോൾ യുവി ബുദ്ധിമുട്ടിയിട്ടുണ്ട്; BCCI 'കുടുംബനിയന്ത്രണ'ത്തെ പിന്തുണച്ച് യുവരാജിന്റെ ഭാര്യ

കുടുംബത്തെ കൂടെ കൂട്ടുന്നതിൽ ഇന്ത്യൻ ക്രിക്കറ്റ് താരങ്ങൾക്ക് മേൽ ബിസിസിഐ പുതുതായി കൊണ്ടുവന്ന നിയമങ്ങളെ പിന്തുണച്ച് മുൻ ഇന്ത്യൻ താരം യുവരാജ് സിങ്ങിന്റെ ഭാര്യ ഹേസൽ കീച്ച്. പ്രിയപ്പെട്ടവരിൽ നിന്ന് വളരെക്കാലം അകന്നു നിൽക്കുന്നത് ബുദ്ധിമുട്ടാണെങ്കിലും കളിക്കാർക്ക് കളിയിൽ ശ്രദ്ധ കേന്ദ്രീകരിക്കാൻ ഇത് സഹായിക്കുമെന്ന് പറഞ്ഞു.

യുവിയോടപ്പം പരമ്പരകൾക്ക് താനും കൂടെ പോകുമ്പോൾ എപ്പോഴും അദ്ദേഹം ആശങ്കവാനായിരുന്നു, കുറച്ചുദിവസത്തേക്ക് അകന്ന് നിൽക്കുന്നത് ബുദ്ധിമുട്ടാണെങ്കിലും യുവിയുടെ കളിയിലുള്ള നിയന്ത്രണം ഉറപ്പുവരുത്താൻ താൻ എപ്പോഴും മാറിനിൽക്കാനാണ് ശ്രമിക്കാറെന്നും കീച്ച് പറഞ്ഞു.

അതേ സമയം താരങ്ങൾക്ക് മേലുള്ള നിയന്ത്രങ്ങളിൽ വിമർശനവുമായി സൂപ്പർ താരം വിരാട് കോഹ്‌ലി രംഗത്തെത്തിയതിന് പിന്നാലെ നിയന്ത്രണങ്ങളിൽ ഇളവ് വരുത്താൻ ബിസിസിഐ തീരുമാനിച്ചിരുന്നു. വിദേശ പരമ്പരകളില്‍ ഇപ്പോള്‍ നിര്‍ദേശിച്ചതിലും കൂടുതല്‍ സമയം കുടുംബത്തെ കൂടെ നിര്‍ത്തണമെങ്കില്‍ പ്രത്യേക അനുമതി വാങ്ങിയാല്‍ മതിയെന്ന നിര്‍ദേശമാണ് ബിസിസിഐ ഇപ്പോൾ മുന്നോട്ടുവെക്കുന്നതെന്ന് വാര്‍ത്താ ഏജന്‍സിയായ എഎന്‍ഐ റിപ്പോര്‍ട്ട് ചെയ്തു.

ഇന്ത്യൻ ടീമിന്റെ പര്യടനങ്ങളിൽ കുടുംബങ്ങളുടെ സാന്നിധ്യം ഉറപ്പാക്കണമെന്നായിരുന്നു കോഹ്‌ലി പറഞ്ഞത്. പ്രത്യേകിച്ച് കളിക്കാർക്ക് മാനസിക ബുദ്ധിമുട്ടുള്ള സമയങ്ങൾ നേരിടേണ്ടി വരുമ്പോൾ കൂടെ നിൽക്കാൻ പങ്കാളിയുണ്ടാകുന്നത് ഗുണം ചെയ്യുമെന്നും താരം പറഞ്ഞു.കോഹ്‌ലിയെ കൂടാതെ മറ്റ് ഇന്ത്യൻ താരങ്ങളും ബിസിസിഐയുടെ പുതിയ നിയമത്തിനെതിരെ തങ്ങളുടെ വിയോജിപ്പ് അറിയിച്ചിരുന്നു.

ബോർഡർ-ഗവാസ്‌കർ ട്രോഫിയിൽ ഇന്ത്യ ഓസ്ട്രേലിയയോട് 3-1 ന് പരാജയപ്പെട്ടതിനെത്തുടർന്നായിരുന്നു ക്രിക്കറ്റ് കൺട്രോൾ ബോർഡ് (ബിസിസിഐ) ടൂറുകളിൽ കളിക്കാരുടെ കുടുംബ സമയം പരിമിതപ്പെടുത്തുന്ന നിർദ്ദേശങ്ങൾ അവതരിപ്പിച്ചത്. പുതിയ നിയമമനുസരിച്ച് 45 ദിവസത്തിൽ കൂടുതലുള്ള ഒരു പര്യടനത്തിന്റെ ആദ്യ രണ്ടാഴ്ചയ്ക്ക് ശേഷം കളിക്കാരുടെ അടുത്ത കുടുംബാംഗങ്ങൾ, പങ്കാളികൾ, കുട്ടികൾ എന്നിവർക്ക് 14 ദിവസത്തേക്ക് മാത്രമേ താരങ്ങൾക്ക് ചേരാൻ അനുവാദമുള്ളൂ, അതിൽ തന്നെ ഒരുപാട് നിയന്ത്രണങ്ങളുണ്ട്.

ഇതിന് പുറമെ പേഴ്‌സണൽ സ്റ്റാഫുകളെ കൊണ്ടുപോകാനും ഒറ്റയ്‌ക്കൊറ്റയ്ക്ക് യാത്ര ചെയ്യാനുമെല്ലാം ബിസിസിഐ നിയന്ത്രണം വരുത്തിയിരുന്നു. ഈ കഴിഞ്ഞ ചാംപ്യൻസ് ട്രോഫി മുതലാണ് നിയമങ്ങൾ പ്രാബല്യത്തിൽ വന്നിരുന്നത്.

Content Highlights:BCCI's family-time rule: Yuvraj Singh's wife Hazel Keech supports it